Jolina Magdangal, boses ng Super Twins theme song!

Si Jolina Magdangal ang napiling kumanta ng bagong theme song ng bagong telefantasya na aabangan sa GMA, ang Super Twins na pinagbibidahan nina Jennylyn Mercado at Nadine Samonte.

“Kahit sino (ang) piliin para kumanta ng theme song ng isang teleserye na pang primetime, pang-masa, maganda ang istorya--siyempre sobrang proud ang feeling ‘nun.” At kita naman sa kaniyang expression at pananalita na proud at happy si Jolina sa project na ito.

Pero tiyak na ikagugulat ng lahat kung sino ang sumulat ng awitin! Ito’y walang iba kundi si Michael V. na mas kilala sa pagsulat ng mga kantang puro katatawanan.

“Iniisip ko, itong kantang ito ay babagay dahil at the end of the day, palaging maaayos yan ng hero,” paliwanag ni Bitoy. Dagdag pa niya, “Marami akong ginagawa na mga seryosong kanta talaga. Other side nga talaga.”

“Ang binigay sa aking study tape, yung boses ni Kuya Bitoy,” kwento ni Jolina. “Nagulat ako! Kasi lagi ko siyang naririnig na kumakanta ng mga parang kalokohan. (Tapos) parang Josh Groban ang dinig ko sa kanya!”

Kaya naman si Michael V. na rin mismo ang nagsilbing voice coach ni Jolina.

“After nung initial na take namin, sabi ko gawa tayo ng Jolina version,” pasimula ni Bitoy. “Hopefully, itong magiging resulta is a mix nung dalawang versions na pinagtrabahuhan namin.”

Pihadong kagigiliwan ang theme song ng Super Twins pag nagsimula na itong umere sa GMA Telebabad simula sa February 12.