Gladys, malabo nang makabalik sa ‘EB’ dahil kay Rufa Mae?

MUKHANG malabo na talagang makabalik si Gladys Guevarra sa Eat Bulaga ngayong balitang si Rufa Mae Quinto na ang papalit sa kanya sa naturang noontime show sa GMA7. Bukas, Sunday, guest si Rufa Mae sa S-Files para sagutin ang pagkakadawit ng kanyang pangalan sa isang napakalaking intriga at para patotohanan din kung siya na nga ang ipinalit kay Gladys sa EB. Sa naturang talk show din, magsasalita na si Jay R tungkol sa namamagitan daw sa kanila ngayon ni Alessandra de Rossi. Mabubulgar din sa talk show ang buweltang galit ng young actress/dancer sa young actor boyfriend na tinakbuhan ang responsibilidad sa kanya. Ginamit pa raw ng boyfriend ng actress/dancer ang kotse niya na nabangga pero hindi siya tinulungang magpagawa. Ang iba pang tampok na usapan ay ang wedding preparation nina Danica Sotto at Mark Pingris. Natagpuan narin daw ng dalawa ang foreigner dad ni Mark. May live interview din kina Ely Buendia, Alfred Vargas at LJ Reyes, Ara Mina at Polo Ravales tungkol sa kani-kanilang issues.