Sunshine Dizon, nabastos sa Dinagyang Festival?

SA closing ceremonies ng Dinagyang Festival sa Iloilo, hindi magkamayaw ang mga fans nang makita nilang bumibirit sa pagkanta ang Bakekang star na si Sunshine Dizon. Pero ang masayang eksenang ito, biglang napalitan ng tension nang biglang pumasok sa stage ang isang talent ng kabilang istasyon habang naghahanda si Sunshine sa next song number niya.

Bagama't hindi kilala ng aktres si Matt Evans, ang talent na sumingit sa kanya, ipinahayag ni Sunshine ang pagkainis dahil sa unethical na ginawa ng binata. Ngayon pa lamang daw niya naranasan ang ganitong treatment.

Napagkasunduang ang mga star muna ng GMA7 ang magpe-perform bago ang mga taga-ABS CBN, ngunit pinagbigyan na rin ng festival foundation na mag-alternate ang performances upang hindi ma-delay ang flight ng kanilang mga artista.

Ayon sa kampo ng ABS-CBN, mayroon na silang go signal na papasukin sa stage si Matt Evan kaya ganoon nga ang ginawa nito.

Inako na ng Dinagyang Festival foundation ang nangyaring pagkakamali sa presentation, at humingi ng public apology ang executive director nitong si Ben Jimena.