Billy Crawford's It's Time Concert A Success!

Napasayaw ni Billy Crawford ang nanood ng kanyang It’s Time concert last Saturday, kaya tiyak na babalik ito ng bansa.

Nagbiro kasi itong ’di na babalik ’pag hindi napasayaw ang tao sa kanyang concert. Eh, nagsayawan pati mga bata, lalo na sa Earth, Wind & Fire at Michael Jackson medleys.

Pinakaunang sumayaw sina Rufa Mae Quinto, Yasmien Kurdi at Vina Morales at sumunod na yumugyog ang iba pang celebrities.

Star-studded ang event at nanood din sina Ruffa at Raymond Gutierrez, Dindong Dantes, Rustom Padilla, Iza Calzado, JC de Vera, Rachel Alejandro, William Martinez, Yayo Aguila and kids, Polo Ravales at Allan K.

Nanood din si Frank Garcia (nawalan ng cellphone), Nadia Montenegro, Mother Lily Monteverde, Malou Choa-Fagar, Manny Valera, Tessa Prieto-Valdez, John Estrada and GF, Sheree, Gian Magdangal, Margaret Wilson, Rowell Santiago, Alvin Patrimonio, Claire dela Fuente, Vivian Velez, Janelle Jamer at Richard Gomez. Guests ni Billy ang mga magulang, lalo na ang amang si Jack Crawford, na noon lang siya napanood at sa tuwa’y naiyak.

Gusto namin ang opening number ni Billy na para siyang si Spiderman na patiwarik na bumababa mula sa taas ng Big Dome. Hindi man lang napagod si Billy sa 23 songs plus a lot of dancing na ginawa at pang-international talaga ang performance nito. Gumalaw nga ang stage gaya nang ipinangako nito.

Kung ’di mababago ang plano, bukas na ang alis ni Billy for Los Angeles para mag-record ng album. Pero sabi ni Rams David, babalik ito bago pa ang December 8 guesting nito sa Diva-Licious concert ni Pops Fernandez.