Francine, suporta lang sa ‘Kamandag’

ALAM n’yo bang pasok din sa cast ng Kamandag si Francine Prieto, pero hindi siya leading lady ni Richard Gutierrez.

Sina Maxene Magalona, Ehra Madrigal at Jewel Mische ang mga kapareha ni Richard, pero markado naman ang supporting role ni Francine.

Dito magagamit ng sexy star ang talento sa pag-a-action, gaya ng ginawa sa Etheria dati.

Bukod kay Francine, pasok din sa Kamandag cast si Mark Anthony Fernandez. Bida-kontrabida ang papel ni Mark at magiging kaibigan ni Richard sa istorya.

Ang pangunahing villain nama’y si Johnny Delgado. Oh, yes, balik-GMA-7 po si Johnny matapos lumabas sa isang sitcom kasama ni Pops Fernandez sa Kapuso channel.

Ang iba pang makakasama nina Richard ay sina Mart Escudero, Ariel Rivera, Zoren Legaspi, Benjie Paras, Melissa Mendez at Ronaldo Valdez.

Hindi pa rin alam kung aling gubat ang gagamiting location ng Kamandag, na balita nami’y ipalalabas sa October, kapalit ng Mga Mata ni Anghelita.