Hindi ako monster -- Angel

“LUMAKI na ba talaga ang ulo ko?” ang tila nanlulumong tanong ni Angel Locsin bunga ng naglalabasang balita na tinanggihan niya ang alok na Marimar ng home studio na GMA-7.

Medyo naiiyak pa niyang inamin na bothered siya sa impresyong unti-unti na siyang nagiging “monster” dahil sa naging desisyon.

Hindi naman daw niya tinanggihan ang nasabing pryoekto, hindi lang mag-meet ang schedule niya at ang taping dates.

May lumabas ding tsika na never itong inalok kay Angel kaya nagpa-audition ang istasyon.

Sa totoo lang, marami na kaming naririnig na kuwento na kesyo mahirap nang kausap si Angel at kung tatawagan nama’y ang manager na si Becky Aguila ang laging sumasagot sa cellphone ng aktres.

Nu’ng minsan, naringgan pa raw si Angel na nag-dialogue ng, “Pagod na akong magtrabaho!”

Lalo pang lumala ang scenario nang magdesisyon itong magpahinga ng dalawang buwan sa showbiz para mag-aral ng fashion designing sa London.

Ito’y sa kabila nga ng alok na gawin ang Marimar ng Siyete.

Sa presscon ng Eagle Eye Productions’ trilogy movie na Angels, kinumpirma ng aktres na totoong pupunta siya sa London next month. Pagbalik niya, agad na sisimulan ang proyekto opposite Dennis Trillo sa Regal Entertainment ni Mother Lily Monteverde.

Hindi lang kami sure kung iba ito sa sinasabing sisimulan nina Dennis at Judy Ann Santos sa Regal.

“Wala na akong contract sa GMA, hindi na rin ako co-managed ng Artist Center. Pero sa pagkakaalam ko, walang bad blood sa amin (ng GMA-7),” ani Angel.

Para na raw niyang nanay ang Kapuso execs na sina Wilma Galvante, Redgie Magno atbp., dahil ito nga ang mga humubog sa kanya bilang aktres.

“Alam ko naman itong pinasok ko, so bakit ko gugustuhing magpahinga? Aaminin ko, nu’ng una, pinasok ko ang showbiz dahil sa kita, para makatulong sa pamilya ko. Pero ngayon, mahal ko na ’to. Hinding-hindi ko iiwan ang showbiz.

“Mahal ko si Mother Lily. Nai-inspire nga ako sa pagmamahal niya sa industriya, kaya eto, kahit paano’y tumutulong akong buhayin ang pelikula (by producing Angels). Pero, apat na soap na magkakasunod na ang ginawa ko, gusto ko lang magpahinga.

“Hindi ako monster at hindi rin lumaki ang ulo ko. Masakit, kasi ginawa ko naman ang lahat. ’Pag sinabi nilang tumambling ako, tuma-tumbling ako, ’pag sinabing pumunta ako sa ganitong show, pumupunta ako. Eto nga o, nagkapasa-pasa na ako sa mga pinaggagagawa ko,” pahayag ni Angel, sabay lilis sa maong pants para ipakita sa press ang mga pasa sa binti.

Masaya raw siya kung totoong si Marian Rivera na ang napiling gumanap sa papel ni Marimar under Direk Joyce Bernal.

“Okey naman si Marian, eh,” susog pa nito.

Hindi raw siya puwedeng magsisi sakali mang maungusan ng alaga ni Popoy Caritativo, dahil choice niyang mag-aral muna.

Aware raw si Angel na hindi puwedeng mapasa-kanya ang lahat.